Foto de Manolinho Captura.

Hai unha semana escoitei por vez primeira na miña vida a un dillei dunha discoteca falar en galego (Barmacia en Santa Comba).

Hoxe descubro o primeiro tema dance en galego, e como aventuraron os Tonechos na Estrada tiña que ser (non lembro ter ouvido nunca tras moitos anos saíndo en Ordes, terra netamente galegofalante, a un só dillei dirixirse á xente en galego).

Descúlpenme vostedes se coñecen outros exemplos pioneiros ou que por normais nunca chamaron a atención. Un non andou aínda toda a xeografía galega, pero algo coñece por fóra das cidades. O importante é que hai por Galiza miríadas de persoas que saen de noite e percorren pubs e discotecas escoitando sempre falar da música da que gustan nun idioma que non empregan. Coido que a miña experiencia non é excepcional.

Acho que fóra dos círculos restritos doutros estilos musicais e de certas rutas urbanas alternativas, isto é un bo sinal (nunca é tarde se a música é boa). Quizá é o único sinal de que o galego se normaliza cando menos un bocado fóra dos sectores máis comprometidos coa nosa lingua. Mais, nestes ambientes non formais e informais (os que realmente importan), faino sen axuda pública de ningún tipo.

Dona Marisol, tome nota se quer exercer ben o seu posto e facer ben o seu traballo: campaña de dilleis e de ligoteo en galego nas discotecas galegas, xa! E, por decencia, deixe de subvencionar aos xornais 99% en castelán.

Xa fixeron o anuncio oficial Goretoxo e Dorfun, así que agora é a miña vez.

Xa está emitindo para todo o Mundo (con cobertura de internet) a terceira canle radiofónica con música integramente feita ou tocada en Galiza ou en galego: Radio Blogaliza. Si, a terceira. Despois da desaparecida http://www.radiogaliza.net/ e da efémera Radio Fillos, e antes de que a propia Radio Galega Música resolva programar só música nacional, como debería facer nun panorama musical e radiofónico que non resposta obxectivamente ás preferencias e demandas da audiencia galega.

A radio conta cun arquivo de máis de 1.200 cancións de música popular galega (MPG ), e foron colgadas na rede polos seus autores ou polas discográficas para a súa difusión masiva a través da libre descarga, cando non publicadas directamente baixo unha licenza Creative Commons. Podes ler máis acerca das orixes e filosofía da radio aquí.

O Máximo Testapeza é o primeiro presentador que vén de fichar por esta emisora . Polo de agora estase a experimentar o sistema Cotovia de síntese electrónica de voz humana, empregando a sindicación de contidos dos fluxos RSS para ‘ler’ algunhas das últimas noticias pubicadas na rede social informativa Chuza!. As posibilidades son moitas e habemos seguir fedellando, se os ventos son propicios.

Que a disfrutes!

No camiño ficaron Khaled, Milladoiro, A Orquestra Árabe de Nazareth, Richard Bona, João Afonso… e esperamos a chegada de Dominique A.

(todos os MP3 dispoñibles para a libre descarga aquí e máis aquí)

O Nadal é unha época na que as persoas que sofren algún problema persoal ou familiar adoitan sentirse aínda peor. Cando un repara nisto ou ten perto a alguén que pasa por un mal momento non pode senón tentar facer algo e botar unha man.

O meu pequeno contributo este ano foi instalar unha aplicación de computación distribuída que tira proveito dos instantes mortos da túa computadora para realizar operacións matemáticas que contribúen para o desenvolvemento de proxectos complexos da medicina vaseados no cálculo numérico.

No meu caso instalei no meu portátil e nuns cantos PCs da miña empresa a aplicación da World Community Grid. Segundo eles mesmos se definen trataríase da rede pública de computación máis extensa do mundo, un proxecto lanzado por un grupo internacional de expertos en ciencias da saúde, e promovido pola IBM e unha longa serie de parceiros de todo tipo.

A aplicación consiste nun salvapantallas de aparencia agradábel que realiza cálculos para até catro proxectos diferentes: loita contra o cancro, curas contra a distrofia muscular, análise do xenoma, e deseño artifical de proteínas para uso en humanos. A descarga da aplicación está dispoñíbel para MS Windows, GNU/Linux e Mac.

Malia a nacer nos EUA esta iniciativa topou mellor recepción en Europa. Os usuarios agrúpanse por equipos, e está en marcha un grupo de usuarios chamado Galiza.

A WCG é só un dos múltiples proxectos existentes. Existen páxinas de recursos como a Distributed.net onde se relacionan moitos outros, quizá con menos “charme” e recursos detrás, pero que se cadran poden resultar igual ou máis interesantes. O sistema de cálculo distribuído ten cabida para experimentos de todo tipo. Só hai que lembrar a existencia de proxectos como o Seti@Home, que analiza sinais electromagnéticas procedentes do Espazo en percura de indicios de intelixencia extraterrestre, e é quizá o que alcanzou máis difusión na rede (e sen dúbida o máis friqui).

Etiquetas: computacion, distribuida, saude

Mais para tod@s a quen, gustándovos todo o que de bon hai entre as iniciativas musicais galegas que van abríndose camiño nos últimos tempos, gustándovos os traballos de arqueoloxía e innovación musical que se están a facer, aínda así, fáisevos pequena a oferta musical matria, aquí vai outra ristra de novos temas para o radioblog.

Sodes capaces de ver ao Alejandro Sanz cantando en galego?

E á Shakira. E ao Serrat. E á Gloria Stefan. E ao Ricky Martin. E á Laura Pausini. E aos Pet Shop Boys. E á Omara Portuondo. E ao Sting?

Imaxinades versións en galego dos Beatles, do Charlie Chaplin, dos Earth Wind & Fire, da Tracy Chapman, do Falco, do Ray Charles, ou de Radio Futura?

Escoitade, escoitade sen prexuízos. E despois dicídeme se non somos plenamente internacionais…

E por certo, todas as versións a dúo dos clásicos de Serrat que inclúe ese vello album publicado no Brasil non tén desperdicio. Nen sequer o desafinado do Caetano. Altamente recomendado.