Radio Blogaliza
Xa fixeron o anuncio oficial Goretoxo e Dorfun, así que agora é a miña vez.
Xa está emitindo para todo o Mundo (con cobertura de internet) a terceira canle radiofónica con música integramente feita ou tocada en Galiza ou en galego: Radio Blogaliza. Si, a terceira. Despois da desaparecida http://www.radiogaliza.net/ e da efémera Radio Fillos, e antes de que a propia Radio Galega Música resolva programar só música nacional, como debería facer nun panorama musical e radiofónico que non resposta obxectivamente ás preferencias e demandas da audiencia galega.
A radio conta cun arquivo de máis de 1.200 cancións de música popular galega (MPG 
), e foron colgadas na rede polos seus autores ou polas discográficas para a súa difusión masiva a través da libre descarga, cando non publicadas directamente baixo unha licenza Creative Commons. Podes ler máis acerca das orixes e filosofía da radio aquí.
O Máximo Testapeza é o primeiro presentador que vén de fichar por esta emisora 
. Polo de agora estase a experimentar o sistema Cotovia de síntese electrónica de voz humana, empregando a sindicación de contidos dos fluxos RSS para ‘ler’ algunhas das últimas noticias pubicadas na rede social informativa Chuza!. As posibilidades son moitas e habemos seguir fedellando, se os ventos son propicios.
Que a disfrutes!
Surcando unha maxia inusual
Sempre igual
Si, eu tamén me pregunto onde está Nunca Máis agora que o escándalo REGANOSA logrou rachar o muro do silencio.
Sempre igual.
Da Mourela ao Courel (de desfeita en desfeita até ao desastre final)
Porén…
…aínda estás a tempo. Formulario de sinaturas
Há povo!
Deseño dos Aduaneiros sem Fronteiras
Cita en Ferrol
Non se poden tomar decisións que afectan ao pobo sen contar con el. Dá igual ter razón ou non tela, hai que contar coa xente. E máis se un día se estivo de parte dela e agora dáselle as costas para aínda encima servir aos intereses privados dun Grupo industrial chamado Tojeiro.
Non se pode xustificar unha ilegalidade como a planta regasificadora de REGANOSA co argumento de que xa estaba aí. Non se pode ocultar unha aberración e darlle carta de normalidade. Hai que eliminala. O contrario é defender políticas de feitos consumados. E non valen. Nin no urbanismo nin tampouco na política industrial.
Non vale o argumento da soberanía enerxética para defender unha instalación perigosa que non cumpre coa normativa europea. Para iso mellor era deixar facer a nuclear en Xove. Non serve dicir que no futuro será positivo para o tecido económico se agora moitas persoas saen prexudicadas e se pisan os seus dereitos.
Non vale de nada sacrificar politicamente a terceira zona máis poboada de Galiza a cambio do futuro inmediato de dous ou tres concellos pequenos. Non, a menos que se queira ser un suicida político ou, peor, venderse aos poderes fácticos.
Non estamos nunha época en que a poboación se deixe dirixir por vangarda ideolóxica ningunha. E menos se falamos da Ría de Ferrol, que xa saben demasiado de tecnócratas industriosos, promesas rotas e futuribles hipotéticos. Estamos na era da horizontalidade, das redes sociais, da intercomunicación e do fluír da información. Nos tempos que corren algúns queren xogar á gran política de Estado caendo na corrupción dos partidos clásicos. Non se pode enganar así e pretender saír vitorioso.
Non sei en que rematará isto pero non para de lembrarme outra historia. Espertamos moitas veces e o dinosaurio aínda estaba alí. Houbo que botalo.
REGANOSTRA é o resultado da unión de Gas natural, Unión Fenosa, Grupo Tojeiro, Sonatrach, Caixa Galicia, Caixanova, Banco Pastor e Endesa, coa aquiescencia da Xunta de Manuel Fraga, e o sorriso displicente da Xunta de Touriño e de Quintana.
Vídeo 1 da manifestación e carga policial o 30 de Maio
Vídeo 2 da manifestación e carga policial o 30 de Maio
Vídeo 3 da manifestación e carga policial o 30 de Maio
Vídeo 4 da manifestación e carga policial o 30 de Maio
Audio da carga policial do 30 de Maio ao vivo na Radio Galega
Fotos da carga policial do 30 de Maio
Vídeo que lembra aos que seguen loitando e aos que xa non loitan
Vídeo cos materiais empregados no recheo da Ría de Ferrol
Segue en Chuza! todas as noticias sobre REGANOSA. A realidade contada ao instante polas persoas, e non polos medios ou os políticos.
Tes informacións máis que detalladas nas webs do Comité Cidadán de Emerxencia e na Plataforma Ártabra 21
Non deixes de ver, cando teñas oportunidade, o documental O Salario do Silencio, de Henrique Banet e Mabel Rivera.
Podes autoinculparte nas accións cidadás en solidariedade cun cidadán detido polo simple feito de defender a legalidade fronte a REGANOSA e as institucións.
As consignas do enemigo están moi claras. E as respostas tamén:
- Reganosa é totalmente legal. Ten todos os requisitos, cumpriu todos os trámites e todas as administracións abenzoan a pranta. FALSO. Non se cumpriu o R.D. 1254/99, fundamentado na directiva europea 96/82/CE, que regula as medidas de control dos riscos inherentes aos accidentes graves nos que interveñan sustancias perigosas. A planta instalouse dentro da ria de Ferrol, sen o preceptivo informe de impacto ambiental. Hai dúas sentencias xudiciais favorables á poboación que foron recorridas por quen é xuíz e parte en REGANOSA: A Xunta de Galicia.
- O conflito é dos mariñeiros e mariscadores coa industria, e se soluciona cunhas axudas polos días que non se poida faenar por mor da entrada de buques na ría. FALSO. A protesta é un movemento cidadán e popular, nucleado a partir do Comité Cidadán de Emerxencia da Ría de Ferrol, pero do que forman parte xa máis de 60 asociacións e entidades de Ferrolterra e Galiza enteira. Non se trata de perdas económicas dos mariscadores, senón de perdas económicas e ambientais de todo o mundo na Ría. REGANOSA privatiza beneficios e socializa perdas.
- As protestas son en defensa da seguridade e do medio ambiente da Ría de Ferrol. FALSO. Non só iso. As verdades a medias son as peores mentiras, sobre todo cando se repiten unha e outra vez polos altofalantes mediáticos. A protesta cidadán tamén perseque a defensa da xustiza, e como aínda cre nela, persegue o cumprimento dunha legalidade que outros non dubidan en pisotear. A protesta tamén vai en contra da corrupción político-financeira que hai detrás de REGANOSA e na que participaron en menor ou maior grao e desde diferentes instancias as tres grandes forzas políticas galegas.
- Os resultados electorais das municipais en Ferrolterra e na Ría de Ferrol pouco ou nada teñen que ver co tema da regasificadora. FALSO. A estratexia política do BNG na comarca foi dar unha viraxe de 180º para apoiar o proxecto dentro da Ría, chegando a retirar co seu voto os recursos que no seu día puxeran eles mesmos desde o Concello de Ferrol. No conxunto dos concellos da Ría de Ferrol o BNG pasa a ser cuarta forza política, por detrás de Terra Galega. En Mugardos melloran un concelleiro desde a alcaldía, pero só a costa dos Independentes e un pouco do Partido Popular. Nas Pontes perden a alcaldía. Eses son os dous concellos máis beneficiados por REGANOSA. No resto debacle máis ou menos evidente. É o que acontece cando se desfai unha organización política en aras doutros intereses.
King James
